​​

Press Release : | English, Français

Sêndo tî Bêafrîka II : Amû pakara Mahamat Said Abdel Kani na CPI ndâli tî âgino tî sêhalëzo ngâ na gino tî birä

ICC-CPI-2021024-PR1559


Lâsô, längö 24 tî nze tî nyenye 2021, âkötä âzo tî Bêafrîka, RCA, amû pakara Mahamat Said Abdel Kani sô ahînga lo ngâ na ïrï tî « Mahamat Said Abdel Kain » wala « Mahamat Saïd Abdelkani » (« pakara Said ») na dangbanga tî pöpö-ködörö tëtî gine, « CPI » wala « Dangbanga » na pekô tî mbëtï tî gbüngö-zo tî zô wala mandat d'arrêt sô CPI adë ngbêne yê na längö 7 tî nze tî nyenye 2019, sô azîa mênde na ndömbê nî. Pakara Said ayeke wagbegïbê wala suspect ndâli tî âgino tî birä wala crimes de guerre ngâ na gino tî sêhalëzo wala crimes contre l'humanité sô asâla nî na yâ tî ködörö tî Bêafrîka na ngû 2013.

Na tângo tî dëngö mbëtï tî gbüngö zo sô, ngêngêlê wafängö-ngbanga tî kubû tî kôzo kua II wala juge unique de la Chambre préliminaire II, Rosario Salvatore Aitala, abâa atene lêgë ayeke da tî tene zo amä na bê atene mbênî tiri sô ayeke tî pöpö-ködörö pëpe ayeke lânî da na ndö-sêse tî Bêafrîka tî löndö ndurü na nze tî mbângö 2013 asï ndurü na nze tî nyenye 2014 na pöpö tî âSELEKA (sô ayeke mbênî bûngbi tî âgbâzo na yêto wala groupes armés sô na yâ nî mo yeke wara mbîrîmbîrî âmizilmï sô ayê tënë tî ngbêne gbïä François Bozizé pëpe) ngâ na âanti-Balaka (sô ayeke mbênî bûngbi tî âzo sô ayê tënë tî ngbêne gbïä François Bozizé). Ngâ na mbâgë, ngêngêlê wafängö-ngbanga abâa atene lêgë ayeke da tî tene zo amä na bê atene tî löndö ndurü na nze tî mbângö 2013 asï ndurü na nze tî nyenye 2014, âwatiri tî SELEKA atö lito gbânî gbânî na ndo kuê na terê tî âsêngê zo tî ködörö ngâ na âzo sô âla bâa âla tönga na âwandöli wala wamakörö wala âzo tî müngï mabôko na ngbêne ngurugbïâ tî François Bozizâ, ngâ na pekô nî na âanti-Balaka.

Ngêngêlê wafängö-ngbanga amä na bê sô pakara Said, sô lo yeke môlengê tî ködörö-sêse tî Bêafrîka, sô adü lo na längö 25 tî nze tî folondïgi 1970 na Bria, ayeke kömändâ tî âSELEKA, sï na kâmba tî lo sô, abâa atene lo yeke wandöli tî âgino tönga sô :

  • âgino tî sêhalëzo wala crimes contre l'humanité (bïngö zo na da tî kânga wala bänzïngö lêgë na zo tî tene lo dutï yamba, nönöngö zo, köndöngö zo na sïönî bibê, höndëngö zo ngâ na sälängö zo tönga na nyama), ngâ na

  • âgino tî birä wala crimes de guerre (nönöngö zo ngâ na sälängö zo na sänä).

Atene pakara Said asâla âgino sô, lo na âmbênî âzo wala na lêgë tî âmbênî âzo, wala lo mû yângâ, wala lo hûnda, wala lo pûsu âzo tî tene âla sâla âgino sô, wala lo mû mabôko na âlêgë ndê ndê tî tene âzo asâla âgino nî.

Watondo tî CPI, pakara Peter Lewis, ayê tî mû singîla na âkötä âzo tî Bêafrîka ngâ na ngurugbïä tî Hollande tëtî mabôko sô âla mû tî tene agbû ngâ sï amû pakara Said na dangbanga.

Fadë kôzo lütïngö na ngbelê ngbânga tî pakara Said ayeke dutï ânde na yâ tî âkêtê längö, sï lêngbanga nî ayeke dutï na dawa tî ngêngêlê wafängö-ngbanga Rosario Salvatore Aitala, sô lo yeke na yâ tî kubû tî kôzo kua II.

Sêdutï : Na längö 30 tî nze tî bêlawü 2014, ngurugbïä tî Bêafrîka ato sêndo wala situation tî ködörö nî na dangbanga tî löndö na 1 tî nze tî kûkurû 2012. Na yâ tî sêndo sô, atene âgbâzo tî SELEKA ngâ na âgbâzo tî anti-Balaka asâla âgino mîngi. Âyê tî ngangü sô asï sô asâla sï gbâ tî âzo sâke sâla awara kuâ ngâ gbâ tî âmbênî ngbangbo ngbango akpë da tî âla sï ague na mbênî ndo ndê. Na längö 24 tî nze tî mvuka 2014, yakapara Fatou Bensouda, watömbä tî CPI, âzî yângâ tî bëmbëngö ndo na ndö tî sêndo nî. CPI azî yângâ tî mbênî lökpälë na yâ tî sêndo sô, sô akpo Alfred Yekatom na Patrice-Edouard Ngaïssona. Fängö-ngbanga na ndö tî lökpälë sô sô ayeke töndâ nî na längö 9 tî nze tî folondïgi 2021.


Tî wara âmbênî âsango na ndö nî, ayeke nzönî âla pûsu ndurü wala âla pîka sînga na Fadi El Abdallah, watöngö-ndâ-tënë ngâ mokônzi tî likua tî puse sango wala affaires publiques, tî Dangbanga tî pöpö-ködörö têtî gino na sînga +31 (0)70 515-9152 wala +31 (0)6 46448938 wala na limo-ndo [email protected]

Âzo alîngbi tî bâa ngâ âyê sô ayeke pasë na yâ tî CPI na ndö tî ângbânda tere tönga sô Twitter, Facebook, Tumblr, YouTube, Instagram et Flickr