​​

Statement : | العربية, English, Français

Depä wala töngö mbëlä tî Fatou Bensouda, Watömbä sô tî tene procureure tî Dangbanga tî pöpö-ködörö tëtî gino wala CPI na ndö tî kâpä tî söröngö zo na ködörö sêse tî Bêafrîka: “Ayeke nzönî kâpä tî söröngö zo na Bêafrîka adutï na yâ tî sîrîrî, sï alîngbi t


A mbëtï limon nâ tî mängö nà mê :

Audio (MPEG-3) tî tènè à télécharger nî

Na längö 27 tî nze tî Kakaüka 2020, âzo tî ködörö sêse tî Bêafrîka ayeke soro gbïä tî ködörö ngâ na âwatokua tî bâda-halëzo.

Na yâ tî âkua tî bëmbëngö-ndo sô ndokua tî mbï atöndâ nî ngbêne yê na ngû 2014, mbï bâa sô âzo tî Bêafrîka asâla ngangü mîngi tî tene sîrîrî adutï na yâ tî ködörö tî âla, mbï bâa nî na tângo tî tambûla tî kua sô mbï sâla fade fade sô na Bangui. Mbï yeke bâa ndo ndurü na ndö tî âyê sô ayeke tambûla na yâ tî ködörö nî, sï li tî mbï akpë na tângo sô mbï yeke mä âsango ndê ndê sô afa atene ngangü ngozo ngâ na bibê tî tiri birä akîri agä na yâ tî ködörö nî na tângo tî kâpä tî sôrörö zo sô.

Mbï tö mbëlä na âmbâgë kuê, âgbâzo na yêto kuê wala groups armés, âwapolosö kuê, ângembö tî âla ngâ na âtanga tî âzo tî tene âla dë bê tî âla ngâ âla dutï kpô.

Ayeke nzönî kâpä tî söröngö zo na Bêafrîka adutï nay â tî sîrîrî, sï alîngbi tî kanga lêgë na sälängö sänä na lêgë tî ngangü âzo na yâ tî ködörö nî.

Ndâli nî lâ, mbï yê tî kîri na ndö tî tënë sô mbï tene kôzo awe, sï mbï yê tî lutï na ndö nî tî tene âla mä mbîrîmbîrî: zo sô asâla, wala amû yângâ tî tene asâla, wala apûsu âzo tî tene âla asâla, wala amû mabôko tî tene âzo asâla âgino wala crimes sô atï na gbe ngangü tî Mberegü tî Rome wala Statut de Rome, atâ na lêgë wa, fade ayeke gbôto lo na gbelê tî âda-ngbanga tî Bêafrîka wala na gbelê tî CPI.

Ndokua tî mbï angbâ lâkuê tî bembe ndô na yâ tî sêndo wala situation tî Bêafrîka, sï lo yeke sâla kuê tî tene âwapâsi tî âsïönî gino sô asï na Bêafrîka awara nzö ngbanga, ngâ sï âwandöli wala âresponsable tî âgino nî afûta pendâ gino tî âla nî, atâ mbâgê wa lâ âla yeke da na yâ tî birä nî.

Ndokua tî Watömba tî CPI ayeke sâla âkua tönga sô, yamba na kamä kuê : pia-bëmbëngö ndö, bëmbëngö-ndo ngâ gbötöngö na gbe tî ngbanga âzo ndâli tî gino tî wünzïngö marä wala crime de genocide, âgino tî sêhalëzo wala crimes contre l'humanité, âgino tî birä wala crimes de guerre ngâ na gino tî lito wala crime d'agression. Ngbêne yê na ngû 2003, ndokua sô abembe ndo na yâ tî âgbâ tî âsêndo wâla âsituation sô atï na gbe ngangü tî CPI, mbîrîmbîrî na Ouganda, Ködörö nguno halêzo tî Congo, Darfur (Soudan), Ködörö-sêse tî Bêafrîka (na yâ tî âsêndo ûse), Kenya, Libye, Côte d'Ivoire, Mali, Georgie, Burundi, Ködörö tî Bangladesh/Ködörö tî Bûngbi tî Myanmar, ngâ na ködörö tî Afghanistan (sô ayeke fade sô na gbe tî surä 18 tî Mberegü tî Rome wala Statut de Rome). Ndokua tî Watömbä ayeke pia-bembe ndo ngâ na ndö tî âsêndo tî Bolivie, Colombie, Guinée, ködörö tî Philippines, ngâ na Venezuela; atâ sô sêndo tî Palestine angbâ tî kü dëngö ngbanga na ndö nî.

Ndo sô avunga sango sô ayeke Ndokua tî Watömbä |Zo alîngbi tî to mbëtï na ndokua sô na lindo sô: [email protected]


Source : Office of the Prosecutor